مرسيدس أطلقت أجدد عربية مرسيدس عندها و هي S class maybach الجديدة كليا و دي أفخم عربية بيتم إنتاجها تحت مظلة علامة مرسيدس بنز، و العربية دي بتتمتع بمميزات أكتر و رفاهية أكتر من النسخة العادية من ال S class. العربية دي أنا بعتبرها قصر متنقل تعالوا نتعرف عليها أكتر و ايه المميزات و الجديد فيها عشان دي حدوتة كبيرة أوي ...
- مبدأيا كده المايباخ الجديدة جاية أطول بـ 30 سم من النسخة العادية و قاعدة عجلات أطول بـ 18 سم عشان تلاقي الرحرحة و تقعد براحتك خالص جواها وكمان شعار مايباخ الشهير جانب على قايم العربية من الخارج.
- عزل الصوت في العربية دي قوي جداً بسبب الزجاج السميك اللي فيها و كمان تقنية عزل الصوت التفاعيلية اللي بتطلع أصوات بترددات معاكسة للأصوات الموجهة للعربية.
- مايباخ الجديدة بتيجي بدهان ثنائي أو Daul Tone و ده بيتعمل يدويا في أسبوع كامل!
- كمان مايباخ الجديدة تقدر تفتح و تقفل الباب لوحدها عشان عيب تدفع الفلوس دي كلها و تفتح الباب بنفسك.
- خلي بالك عشان مايباخ الجديدة حطاك تحت الميكروسكوب و بتابعك و بتابع حركة جسمك بالليزر لو حست مثلا أنك بتتناول حاجة من جنبك هتلاقيها بتنورلك النور، ولو حست أنم بتمد ايدك تمسك الحزام هي هتمدلك الحزام تلقائي.
- الداخلية بتاعة العربية دي بقا كلها دلع و رفاهية و جواها تشكيلة من أجود و أفخم أنواع الجلود و الأخشاب في العالم
- الأمان في العربية دي جاي بمستوى عالي جدا هتلاقي فيه ١٨ ايرباج متوزعين على العربية كلها طبعا مع رادارات و كاميرات محزمين العربية كلها مع باقي وسائل الأمان المتعارف عليها طبعاً، ومرسيدس بتقول أن مايباخ الجديدة تقدر تسوق نفسها بنفسها و تركن وتطلع بدون أي تدخل من حد بس للأسف القوانين متسمحش
- العربية دي بتيجي بأختيارين في الموتور
الأول: موتور V8 تيربو بينتج ٤٩٦ حصان و عزم ٥١٦ نيوتن متر
التاني: موتور V12 تيربو بيطلع ٦٢٠ حصان و عزم ١٠٠٠ نيوتن متر.
- مايباخ الجديدة كمان جاية بفتيس جديد كليا من 9 سرعات.
متنسوش تعملو شير للمقال لكل أصحابكم خليهم يعرفوا أسطورة مرسيدس الجديدة.